TVB处境剧《爱·回家之开心速递》长拍长有，不时都会有演员加入及离开剧组，「CPU」谭坤伦（Alan）喺今年4月宣布离开TVB，并选择北上发展拍剧。最近佢喺社交网站出PO分享喺内地拍剧日常，大讚内地拍剧待遇较好兼工作量少。

现年33岁嘅谭坤伦，6岁时被送到内地少林寺学校学习北派武术，8岁夺得河南省全市武术比赛「棍术套路冠军」及「剑术套路亚军」，本身想当髮型师，但2011年参加TVB节目《功夫新星》入行。谭坤伦亦係一位健身教练，曾透露自己係因为睇咗张家辉嘅电影，所以下定决心要练好自己身形。虽然佢出道十几年，不过都係饰演配角为主，但《On Call 36小时II》实习医生杰仔、《果栏中的江湖大嫂》打手Johnny、《包青天再起风云》马汉及《爱·回家之开心速递》饰演IT三子之一CPU，油头、冇自信、闪缩及口齿不清等，其打扮及演出将角色发挥得淋漓尽致，令人留下深刻印象。

谭坤伦喺今年4月宣布离开TVB，最近佢喺社交网站出PO分享喺内地拍剧日常，除咗大讚有专属化妆师及休息地方等待遇之外，佢仲话连工作量都少啲：「佢哋一组人每日只係拍2.8页纸左右，两组人都係拍五页纸嘅剧本，唔係呢行嘅朋友可能唔明，但係开心速递一日可以拍剧本嘅19页纸，未计外景组。」及「两个组都係基本上同时开工，所以一般晚饭时间可以收工，咁呢个组就锺意开早班，基本上冇乜大夜班。」不过佢亦有讲到美中不足嘅地方就係放饭时间只有15至20分钟。

事隔一日，谭坤伦出PO澄清：「六倍工作量呢个讲法好似有啲夸张，拎其他例子出嚟讲吓啦！我现在拍紧嘅内地剧集30集拍摄六个月，tvb通常一般剧三个月左右，当年包青天再起风云都用咗半年时间都係30集。古装、时装、处境剧，真係好难相比嘅。」及「最近我只係纯粹分享两地不同製作的不同之处，因为一套剧的好与坏，睇嘅係演技同剧情，所以千祈唔好误会，绝对冇什么踩低任何一方。」

去到今日凌晨，佢再出PO感谢传媒、朋友及粉丝支持：「非常多谢媒体嘅报道，出story都係想低调分享，传媒朋友有时候亦都明白佢哋需要标题吸引啲，亦都明白有啲观众，未必会睇内容就留言，所以都明白了解，我嘅表达亦都需要增强，避免不必要误会，多谢媒体嘅关注，真心冇谂过，多谢你哋。」及「仲有多谢留言支持我嘅朋友、粉丝，一个人走上嚟，头几个月真係唔容易，嗰种困难嘅感觉令我感到很难过，现在好彩能够参与大陆剧，非常感恩，老实讲香港人走上嚟，真係冇优势，普通话讲得唔好，拍过嘅作品佢哋觉得冇人睇过，真係一个新人嘅心态，虚心咁样认识每一个人，好好对待所有工作人员，因为佢哋都唔容易」。

按此下载全新Yahoo APP，睇尽最新娱乐新闻、乐坛消息、名人热话、热门电影、Netflix剧评，新人更可换领限量新人礼，立即下载！