26岁嘅kayan9896（吴家忻）喺噚日（22日）凌晨于IG宣布与「百亿富三代」马桂烽（Justin）分手消息，引起网民热烈讨论。除此之外，近日佢获邀请担任由乐队Zpecial主持嘅YouTube节目《醉酒Don’t Call》做嘉宾，期间除咗被问到有啲咩想同旧公司「试当真」讲，佢玩游戏输咗仲打电话俾旧公司嘅同事问有冇嬲佢离开。节目出街后，「试当真」随即喺Threads出PO否认有台前幕后接收过电话，令事件出现罗生门局面。

kayan9896因参与频道「试当真」演出而爆红，除咗成为时尚品牌新宠儿之外，更以歌手身份进军乐坛，但佢喺早前承认已离开「试当真」。近日佢喺YouTube节目《醉酒Don’t Call》担任嘉宾，期间被问到有啲咩想同旧公司讲，佢就话：「我好多谢旧公司对我嘅栽培，对我嘅照顾，冇你冇我」，之后被Zpecial成员指佢虽然真心但官腔，kayan9896就再补充话：「虽然我哋可能有啲拗撬，但我觉得冇嘢係沟通解决唔到，我都好唔开心」。最终kayan9896玩游戏输咗，打电话俾旧公司嘅一位同事，并问有冇嬲佢离开，然后呢位同事就话冇，因为kayan9896係佢朋友，所以觉得kayan9896好就可以啦！

由于声音被变声，所以唔知道kayan9896打电话俾边一个，所以节目出街后网民纷纷猜测係边一个，例如「豪哥FOR SURE啦」、「啲口吻明显係豪哥哥」、「似豪哥or许贤」、「佢啲笑声位同点，好明显係豪哥」「我觉得似locker」及「语气好locker喎」等等，同时亦有网民不满kayan9896消费「试当真」：「Hong Kong Taylor Swift识到条有钱仔搞到冇哂班朋友，依家散咗就搵返旧公司r流量面皮厚到 好心华纳咪成日帮d麻烦人宣传洗白啦」及「隔咗咁耐仲消费旧公司 其实都几差」等等。

而kayan9896旧公司「试当真」亦有喺Threads出PO否认有台前幕后接收过电话：「谢谢大家的关心和查问，我们公司台前幕后并无收过节目电话」，令事件闹出「罗生门」。

按此下载全新Yahoo APP，睇尽最新娱乐新闻、乐坛消息、名人热话、热门电影、Netflix剧评，新人更可换领限量新人礼，立即下载！