圈中知名富二代王贤誌传出因为财务困难而要申请破产，更有指涉及金额达到300万。Vinci之后喺facebook出post写道「关于这个艰难的决定，是我本人经过深思熟虑及徵询多方意见之后慎重作出」，又形容「如果人生的不同阶段就有如天气一样，肯定我将要迎接一段严寒的日子，不过对于未来，我必定不会放弃，继续积极及坚强面对」。但由于已进入司法程序，王贤誌未有再作交代。

同王贤誌一齐喺TVB做过主持嘅吴家乐，早前主持网上节目《娱乐好好玩》时讨论王贤誌破产一事时，直言「呢单新闻出得叫迟」，因为家乐早有听闻。吴家乐话佢同王贤誌过去做过TVB《K-100》节目，大家都有参与节目whatsapp群组。「喺疫情之后都有啲聚会，听到少少佢喺出便都有啲『街数』。我觉得唔奇，因为佢始终係靠自己」。吴家乐又补充，佢听闻王贤誌爸爸已经好几年唔再帮Vinci找数，所以估计王贤誌搞同志真人show《仔仔一堂》可能几吃力。更惊人係，吴家乐相信王贤誌涉及嘅债务，唔止三四百万。

有观众重提王贤誌话锺意过吴家乐一事。根据资料，2年前王贤誌接受访问时，承认曾经喜欢过圈中男艺人拍档，当中提及嘅名字包括陈键锋同吴家乐，更明言家乐应该知Vinci对佢有意思，「我谂唔会唔知啦吓嘛，sense到嘅！」。

吴家乐喺《娱乐好好玩》讲返呢件事，再三重申同王贤誌係同事。佢话当时王贤誌为《仔仔一堂》宣传，有日家乐突然收到Vinci大量短讯话有嘢搵佢。吴家乐心谂「无事不登三宝殿」，一定有阴谋，觉得唔係好嘢，所以冇覆对方。结果第二日就有「王贤誌话锺意过吴家乐」嘅新闻出街，传媒朋友都搵吴家乐，同佢讲「咁好笑，拉埋你落水」。家乐引述传媒朋友所讲，话「摆明係有人想宣传自己嘅节目」。吴家乐直认有为呢件事而嬲，因为王贤誌做完个访问先同佢讲，而且家乐认为即使要做宣传，事先夹定冇所谓。虽然被「摆上枱」，但吴家乐依然觉得王贤誌做主持有优势，因为够压台感。

按此下载全新Yahoo APP，睇尽最新娱乐新闻、乐坛消息、名人热话、热门电影、Netflix剧评，新人更可即时换领限量新人礼，立即下载！