谭玉瑛1979年透过TVB艺员训练班入行，及后由1982年开始主持儿童节目《430穿梭机》、《闪电传真机》、《至NET小人类》、《放学ICU》，绝对係几代人嘅集体回忆。直至2014年，谭玉瑛不被续约，喜爱食嘢同饮酒嘅佢近年乐于转做饮食节目主持，先后主持《阿爷厨房》系列和《香港原味道》系列。谭玉瑛多年来甚少谈及自己嘅私生活，只知佢係圈中小富婆，并与男友周震声相爱近40年；曾有传二人于21年前已秘婚，但谭玉瑛否认瞒婚，并澄清自己一直未结婚。早前，谭玉瑛接受方健仪YouTube频道《女人方言》访问，激罕提及爱情事。

周震声原为谭玉瑛中三时嘅数学代课老师，及后又成为谭玉瑛嘅补习老师，之后开始拍拖，为谭玉瑛初恋男友。谭玉瑛于方健仪YouTube频道《女人方言》坦言自己係个实际嘅人，被问到对结婚睇法，佢回答指：「可能见惯好多人离婚，我身边好多人离婚，我觉得两个人喺埋一齐好开心，但如果唔喺埋一齐就分开，如果分开嘅时间，仲要搞咁多手续，成件事实在太悲剧。」谭玉瑛续指，好多人结婚都係为咗有下一代，但佢就觉得其实做人唔係咁开心，笑言：「唔好搞咁多人出嚟，我点解成日话想努力啲，提升自己做人开心啲，因为做人实在唔係咁开心，所以必须努力，你先可以开开心心过日子，唔好戆吓戆吓咁过」。

谭玉瑛忆起当日做「姐姐」与同事讲再见嘅场面，指当时好想快啲回家，因为有好多记者跟住；方健仪询问谭玉瑛，指除咗避开记者，会唔会係因为屋企有个人等你，觉得屋企係庇护之所。谭玉瑛回应指：「都会，同埋我好锺意喺自己屋企」，对于未来生活，佢就表示好锺意做电台嘅生活：「日日都返工，由星期一至五都要出去做嘢两个锺，因为我住得远，变咗每一日冇咗好多个钟，反而依家喺生活中我会编排生活，睇下可以点先可以食到自己锺意食嘅嘢，维持自己锺意嘅生活模式。」

按此下载全新Yahoo APP，睇尽最新娱乐新闻、乐坛消息、名人热话、热门电影、Netflix剧评，新人更可换领限量新人礼，立即下载！